بعد مشاهدة جلسة محاكمة الرئيس السابق محمد حسني مبارك بدقائق دار هذا الحوار بين مواطنين صديقين من حزب الكنبه:
مواطن 1: شفت الراجل بدل ما يتكسف على دمه من اللي عملو في الناس، جاي المحكمة «مششور» شعره وصابغه ولا اللي رايح النادي، وكل شويه يشاور للعالم ويعمل باي باي ولا كانه حسين فهمي في مهرجان السيما، ونسي ايام ما كان مستموت لنا، ونازل لعب في مناخيرو!!
مواطن 2: طب والله ومالك عليا يمين وهو ورا الحديد برضو برنس كده وعنده كاريزما،.. وبعدين حضرتك زعلان قوي عشان كان بيلعب في مناخيرو مش احسن من اللي فضحنا أُدام الأجانب، وتلفزيوناتهم، وفضل ساعه يلعب في الـ(…..)،.. يا راجل بلاش غم.
مواطن 1: انا مش زعلان ولا حاجه، خللي الناس تصحصح بعد ما شافته كده، وهو في قمة «الانشراح» والشياكه، ويفتكروا كل اللي عمله فيهم، يمكن يكونو نسيو ولا حاجة.
مواطن 2: يا مفتري.. يا ظالم ده اللي عملوه فيكم الاخوان في 8 شهور اضعاف اللي عمله فيكم الراجل السُكره ابو ضحكه جنان ده في 30 سنه، نسيت لما كنا بلد الامن والامان، وكنا ندخل سيما صيفي مع العيال والجماعه ونخرج الساعة 2 الفجر، نروح مشي لحد البيت، والعيال والبنات يسبقونا بييجي 100 متر، ولا خايفين من تحرش، ولا صايع بمطوه يطلع «يثبتنا» ويمد ايده على بناتنا وحريمنا؟
مواطن 1: إنت اللي مفتري.. نسيت الشهدا اللي راحو في 25 يناير، والمدرعات بتاعة حبيب العادلي اللي داست على شبابنا، والالف مصري اللي راحو في العبارة وصاحبك سابهم للقروش تاكلهم وراح الاستاد يتفرج على ماتش كوره؟
نسيت الـ400 صعيدي اللي اتحرقو في القطر اللي ما ينفعش يشيل بني أدمين اصلا؟
نسيت الفساد اللي كان بيحميه ويحرسه ولا كأنه «جيمي» ننوس عين امه خايف عليه لا يبرد، مش كان واخد الفساد في حضنه يرضعه ويكبره ويحميه؟
نسيت بيع القطاع العام بملاليم لأصحاب جيمي «الأمور» ورجالته، وتشريد العمال في الشارع؟
.. نسيت تعليم ولادنا اللي باظ.. والمبيدات المسرطنة اللي خربت كلاوينا وأكبادنا وبقينا أول شعب في العالم في الإصابة بفيروس «سي»؟
نسيت «الغاز» المصري اللي كان بيروح لإسرائيل برخص التراب وإحنا نشتري الأمبوبه بتلاتين زفت. نسيت أراضي مصر اللي إتوزعت على الألاضيش والمحاسيب، وولادنا مش لاقيين شقه في المساكن الشعبية؟
نسيت المياه الملوثة وطوابير العيش وحرق الكنايس بتاعة إخوانا الأقباط،.. وعيالنا اللي كل يوم تغرق بيهم مركب مودياهم أروبا تهريب وهما عارفين إنهم يا هيموتو .. يا هيتسجنو.. يا هيترحلو.. نسيت…
مواطن 2: بس.. بس كفاية ولا عشان ساكت ومبردش فتحت لنا ماسورة «نسيت».. نعم يا سيدي وإيه اللي إتغير من كل البلاوي اللي عمال تفكرني بيها؟
لأ يا سيدي.. والله ما نسيت ولا هنسى كل ده وأكثر منه.. بس حضرتك قوللي إيه اللي إتغير بعد 8 شهور؟.. طوابير العيش.. الميه الملوثه.. الفتنة الطائفية وحرق الكنايس.. عيالنا اللي بيغرقو وهما هاربنين من البلد.. الشهدا اللي في الثورة ولا اللي بعدها أكتر؟.. وحرايق القطارات زي ما هي.. وزاد على كل ده البلطجة والخطف والتثبيت. وضياع الهيبة أُدام دول العالم ومعاداة الأشقاء والأحباب.
أقولك والله إحنا نستاهل أحسن من دول ودوكهم بكتييييير.. واللي احنا فيه حرام.. والله حرام..
وحفظ الله مصر وشعبها من كل سوء.